Të afërmit e tyre humbën jetën nga aksidenti ajror në Indi, familjet: Kemi shtyrë planet e funeralit, në arkivol ishte trupi i një pasagjeri të panjohur

INDI- Familjet britanike që janë në zi pas aksidentit të avionit Air India kanë zbuluar se mbetjet e të dashurve të tyre janë identifikuar gabimisht para riatdhesimit. Të afërmit e një viktime u detyruan të ndryshonin planet e funeralit pasi u informuan se arkivoli i tyre përmbante trupin e një pasagjeri të panjohur.

Në një rast tjetër, mbetjet mortore të “përziera” të më shumë se një personi të vrarë në aksident u vendosën gabimisht në të njëjtin arkivol dhe duhej të ndaheshin përpara se varrimi të mund të ndodhte.

Lajmi erdhi përpara fillimit të një vizite shtetërore dy-ditore në Londër nga kryeministri i Indisë të mërkurën. Narendra Modi do të takohet me homologun e tij britanik, Keir Starmer, për të nënshkruar një marrëveshje të rëndësishme të tregtisë së lirë midis Indisë dhe Mbretërisë së Bashkuar.

Gabimet dolën në pah kur mjekja ligjore e Inner West London, Dr. Fiona Wilcox, kërkoi të verifikonte identitetin e britanikëve të riatdhesuar duke krahasuar ADN-në e tyre me mostrat e ofruara nga familjet.

Një Boeing 787 Dreamliner me destinacion Londrën u përplas më 12 qershor, duke vrarë 241 persona në bord, nga të cilët 52 ishin britanikë që ktheheshin në vendin e tyre. 19 persona të tjerë vdiqën në tokë dhe 67 u plagosën rëndë.

Një raport paraprak zbuloi se çelësat e karburantit të aeroplanit ishin zhvendosur në pozicionin e ndërprerjes, duke thelluar misterin e asaj që ndodhi dhe duke i lënë familjet të shqetësuara e të cilat kërkonin përgjigje.