Hapësirat publike/ "Po bëjmë rregulloren kombëtare, do të vendosë qartë kufijtë", Rama: Do të ketë masa drastike dhe ndëshkime! Jemi në Tiranë, jo Teheran

 

TIRANË- Kryeministri Edi Rama është shprehur ditën e sotme në një dalje në rrjetet e tij sociale se qytetarët duhet të marrin pjesë përmes denoncimeve për lirimin e hapësirave publike.Rama tha se kjo do të bëhet përmes portalit që do të hapet me emrin "Hapësira ime".

Ai shtoi më tej se ndëshkimet për ata që kanë zaptuar hapësirat publike do të jenë të atilla që nuk do të provojë njeri të rikthejë gjërat sërish nga e para. Pas lirimit, kreu i qeverisë tha se vjen rilindja urbane 2.0, ku sipas tij hapësirat dikur të zaptuara do të kthehen  në hapësira të bukura për komunitetin. Ai theksoi se nuk do të lejohet asgjë kolektive.

"E rëndësishme të kuptohemi se nuk është ideja hajde o burra të ndëshkojmë. Do hiqen të gjitha të tëra, do hiqen hap pas hapi. Është gjë e mirë që të gjithë ju të merrni pjesë në proces duke çuar denoncime. Do hapet edhe një adresë e posaçme, portal hapësira ime. Duhet të ndahet mendja që nuk mund të shtohesh përtej kufirit ku nis jeta e komunitetit, kemi vendos plazhet publike, jemi shumë më mirë se vjet, por nuk jemi më mirë se sa duhet. Do të jenë ndëshkime të atilla, që mos ti shkojë mendja njeri të fillojë lojën nga e para.

Mbrapa vjen rilindja urbane 2.0 jemi duke ngritur grupe që këto hapësira ti kthejmë në hapësira të bukura për komunitetin, pastrojmë tek 21 dhjetori, tek komuna e Parisit, por nuk mundet që gjërat të mbeten ashtu duhet të ndërhyjmë më projekte urbanistike për të krijuar hapësira të bukura publike. Ata që kanë prona që i përdorin si parkim e të paligjshme janë të ftuar të vijnë të marrin leje dhe të ndërtojnë parkime, me 2 apo 3 kate që mund të jenë godina shumë të bukura që mund të shfrytëzohen. S’ka për tu lejuar asgjë selektive, tentativat do bëhen, dikush do mbyllë sytë, por nuk do lejohet asgjë selektive, duke bashkëpunuar komuniteti me autoritetet.", tha Rama.