Ngjarja e rëndë ndodhi të shtunën në sheshin kryesor të tregut, një prej zonave më të frekuentuara të qytetit, ku një person i armatosur hapi zjarr në mënyrë të rastësishme ndaj kalimtarëve.
Sipas policisë, autori i dyshuar është një 25-vjeçar, shtetas polak, i cili mbërriti me automjet në shesh rreth orës 15:00 sipas kohës lokale dhe nisi të qëllonte. Si pasojë e sulmit, mbetën të vrarë katër gra dhe dy burra, ndërsa 16 persona të tjerë u plagosën, mes tyre edhe dy efektivë policie.
Autoritetet bëjnë me dije se i dyshuari ishte i veshur me rroba ushtarake dhe përdorte armë të përshkruara si ushtarake. Gjatë kontrollit të automjetit të tij, policia gjeti gjithashtu një sasi të madhe armësh dhe municionesh.
Pas ndërhyrjes së forcave të rendit, 25-vjeçari u qëllua dhe u plagos, përpara se të transportohej në spital. Ai iu nënshtrua disa ndërhyrjeve kirurgjikale dhe ndodhet në gjendje të qëndrueshme, por shumë kritike. Sipas autoriteteve, ai dyshohet se ka vepruar i vetëm.
Hetimet morën një tjetër kthesë të rëndë pasi policia zbuloi edhe tre trupa të pajetë në banesën e të dyshuarit, në Ostrowiec Świętokrzyski, rreth 190 kilometra në veri të Krakovës. Viktimat rezultuan të ishin motra, nëna dhe babai i 25-vjeçarit.
Motivi i sulmit mbetet ende i paqartë, por ministri i Brendshëm polak, Marcin Kierwiński, deklaroi se i dyshuari ishte i magjepsur nga ideologjitë e ekstremit të djathtë dhe kishte pikëpamje shumë radikale.
Ndërkohë, ministri i Mbrojtjes, Władysław Kosiniak-Kamysz, hodhi poshtë raportimet se autori ishte pjesë e ushtrisë polake, duke theksuar se ai nuk kishte pasur asnjë lidhje me forcat e armatosura.
Dy efektivët e policisë që mbetën të plagosur gjatë ndërhyrjes iu nënshtruan operacioneve dhe ndodhen në gjendje të qëndrueshme. Kryeministri polak, Donald Tusk, vlerësoi reagimin e tyre, duke deklaruar se ata me shumë gjasa shpëtuan jetë të shumta, pavarësisht rrezikut që iu kanos gjatë përballjes me sulmuesin.
Mes 16 të plagosurve janë edhe pesë shtetas të huaj, nga Austria, Gjermania, Portugalia, Rusia dhe Britania e Madhe.
Gjatë sulmit, një plumb goditi edhe një tramvaj që po qarkullonte në zonë, duke thyer xhamin e shoferit, por fatmirësisht pa shkaktuar të lënduar. Sipas organizatës për mbrojtjen e kafshëve OTOZ Animals, autori qëlloi gjithashtu dy kuaj që tërhiqnin karroca në qendër të qytetit. Të dy kafshët mbijetuan dhe morën trajtim veterinar.
Ngjarja ka tronditur Poloninë, një vend ku sulmet masive me armë zjarri janë të rralla dhe ku legjislacioni për zotërimin e armëve është ndër më të rreptët në Evropë.
Presidenti polak, Karol Nawrocki, shprehu ngushëllimet për viktimat dhe familjet e tyre, ndërsa kryebashkiaku i Krakovës, Łukasz Gibała, shpalli ditë zie në qytet deri më 11 nëntor.
