Zjarri përfshin ndërtesën dhjetëkatëshe në Belgjikë, konfirmohen 6 viktima dhe disa të plagosur (VIDEO)

 

BELGJIKË- Një zjarr i madh shpërtheu në një ndërtesë dhjetëkatëshe në zonën Linkehoeve të Antëerp, Belgjikë, mëngjesin e kësaj të mërkure, me autoritetet që konfirmuan se ka shumë të vdekur dhe dhjetëra të plagosur.

Mësohet se, ndërtesa që u përfshi nga flakët, strehonte më shumë se 200 persona dhe sipas dëshmisë së policisë, të paktën gjashtë persona kanë humbur jetën. Autoritetet bëjnë me dijë se disa persona janë plagosur rëndë dhe janë dërguar në spitale, ndërsa shumë të tjerë pësuan lëndime të lehta dhe morën ndihmën e parë në vendngjarje. 

“Pak para orës 10:00 të mëngjesit, një zjarr shpërtheu në një pallat apartamentesh në August Vandermeylelaan në Linkeover. Shpejt u bë e qartë se ishte një zjarr serioz. Ka disa të plagosur rëndë dhe disa të plagosur lehtë që po marrin trajtim mjekësor në vendngjarje. Fatkeqësisht, ka edhe disa të vdekur. Për momentin, zjarrfikësit po vazhdojnë hetimet për të parë nëse ka ende njerëz brenda ndërtesës. Nuk mund të japim asnjë shifër për momentin, pasi përparësia është aktualisht kërkimi i viktimave dhe ofrimi i ndihmës mjekësore”, tha Kim Bastien, zëdhënëse e distriktit policor të Antëerpit.

Zjarrfikësit sqaruan se zjarri shpërtheu në katin e tetë të ndërtesës dhe jo në të dhjetën, siç u raportua fillimisht. Kur ekipet e para mbërritën në vendngjarje, ata zbuluan se tymi i dendur kishte mbuluar një pjesë të madhe të ndërtesës. Një video tronditëse ka kapur momentin kur një burrë u ngjit nga ballkoni i tij në dritaren e një fqinji për t'i shpëtuar tymit të zi.

“Ky është një zjarr shumë kompleks. Zjarri nuk është ende nën kontroll, por nuk mund të përhapet më. Ky është një lajm i mire. Ne kemi gjetur njerëz të tjerë. Ekipi ynë i ngjitjes është mobilizuar gjithashtu për të evakuuar njerëzit në mënyrë të pavarur nga kamionët e zjarrfikësve me shkallë., tha një zëdhënës i Departamentit të Zjarrfikësve të Antverpit.