UKRAINË- Një dron rus ka goditur një tren pasagjerësh pranë pikës kufitare Yahodyn, vetëm rreth 2 kilometra nga kufiri me Poloninë, në një incident që ka ngritur shqetësime të reja për përshkallëzimin e sulmeve ruse ndaj infrastrukturës hekurudhore të Ukrainës. Sulmi goditi lokomotivën e trenit, ndërsa autoritetet ukrainase thanë se nuk pati viktima dhe se pasagjerët ishin evakuuar. Sipas kompanisë shtetërore hekurudhore Ukrzaliznytsia, urdhri për evakuimin ishte dhënë vetëm rreth 15 minuta para goditjes.
Incidenti merr një rëndësi të veçantë pasi një tren tjetër, me ish-kryeministrin britanik Boris Johnson dhe zyrtarë të lartë evropianë të sigurisë, kishte kaluar në të njëjtën linjë pak kohë përpara sulmit. Profesoresha Katarzyna Pisarska, kryetare e Forumit të Sigurisë së Varshavës, tha për BBC se ishte në të njëjtin vagon me Johnson dhe Jonathan Powell dhe se sulmi ndodhi rreth 30 minuta pasi treni i tyre kishte kaluar kufirin polak.
Edhe ish-kryeministri suedez Carl Bildt ndodhej në një nga trenat që po ktheheshin nga Kievi. Pasagjerëve iu kërkua fillimisht të përgatiteshin për evakuim, por treni vijoi më pas drejt Polonisë. Ish-shefi i CIA-s David Petraeus, i cili ndodhej në stacionin Yahodyn në një tjetër tren në momentin e sulmit, e përshkroi incidentin si të tmerrshëm.
Ministria ruse e Mbrojtjes deklaroi se kishte goditur infrastrukturën hekurudhore në Ukrainën perëndimore. Ndërkohë, Ukrzaliznytsia tha se objektivi i dronit mund të ketë qenë treni diplomatik, duke e lidhur këtë dyshim me faktin se ai kishte ndryshuar orarin e nisjes për shkak të kërcënimeve të vazhdueshme ruse.
Pas sulmit reagoi edhe Boris Johnson, i cili kritikoi ashpër Vladimir Putinin dhe bëri thirrje për më shumë mbrojtje ajrore për Ukrainën. Ai e cilësoi sulmin si shembull të sulmeve që ukrainasit përballojnë çdo ditë dhe kërkoi që aleatët e Kievit të sigurojnë urgjentisht sistemet dhe raketat interceptuese të nevojshme.
Ministri i Jashtëm ukrainas Andrii Sybiha tha se sulmi pranë kufirit me Poloninë tregonte se terrori i Putin po afrohej drejtpërdrejt te kufijtë e BE-së dhe NATO-s. Në Poloni, kryeministri Donald Tusk thirri një takim urgjent, duke paralajmëruar se veprimet ruse po afrohen gjithnjë e më shumë me territorin polak.
Nga ana tjetër, shefja e politikës së jashtme të BE-së, Kaja Kallas, tha se Rusia mund të jetë duke u përpjekur të frikësojë vendet perëndimore. Sipas saj, përgjigjja duhet të jetë e kundërta: Perëndimi duhet të tregojë se vazhdon të mbështesë Ukrainën dhe se nuk ka frikë. Ndërsa, zëdhënësi i Kremlinit Dmitry Peskov tha se ushtria ruse ka kryer dhe do të vazhdojë të kryejë operacione në të gjithë territorin ukrainas.
Incidenti në Yahodyn vjen në një periudhë kur sulmet ruse ndaj infrastrukturës ukrainase janë intensifikuar. Ukraina raportoi se gjatë natës u lëshuan 108 dronë rusë, nga të cilët 85 u rrëzuan. Në sulme të tjera të fundit janë goditur pika kufitare, trena pasagjerësh dhe depo hekurudhore. Rrjeti hekurudhor mbetet jetik për Ukrainën, pasi transporti ajror civil është pezulluar që nga pushtimi i plotë rus në vitin 2022. Ndërkohë, Moska ka akuzuar edhe Ukrainën për sulme ndaj trenave dhe infrastrukturës në territorin rus.
