SPANJË- Kriza e strehimit po thellon përplasjet politike në Spanjë, pasi parlamenti rrëzoi dy dekrete të qeverisë së kryeministrit Pedro Sánchez, të hartuara për të lehtësuar pasojat e rritjes së qirave dhe dëbimeve të qiramarrësve.
Sipas raportimeve nga mediat e huaja, dekretet nuk morën mbështetjen e nevojshme në parlament, ndërsa qeveria e pakicës po përballet me vështirësi të vazhdueshme për të siguruar shumicën për nismat e saj. Vendimi vjen në një kohë kur protestat kundër krizës së strehimit janë shtuar në vend.
Apelimet e Sanchez janë të kota
Duke folur personalisht gjatë debatit, Pedro Sánchez u bëri thirrje ligjvënësve të mbështesin dekretet kontroverse në mënyrë që të parandalojnë dëme të konsiderueshme për shoqërinë. Ministrja e Strehimit, Isabel Rodríguez, gjithashtu nga Partia Socialiste në pushtet (PSOE), tha se votimi do të tregonte nëse ligjvënësit ishin në anën e qytetarëve apo të fondeve spekulative të investimeve" që kërkonin të dominonin tregun e strehimit.
"Ky është momenti i së vërtetës", përsëriti ajo, duke iu referuar një deklarate të mëparshme të Sánchez që kishte ndezur thashetheme për zgjedhje të parakohshme.
87-vjeçarja Mari Carmen Abascal u dëbua nga shtëpia ku kishte jetuar për dekada të tëra. Qeveria kishte nisur masa për të mbrojtur qiramarrësit e cenueshëm të martën e kaluar, pas dëbimit të një gruaje 87-vjeçare, Mari Carmen Abascal, nga shtëpia ku kishte jetuar për dekada dhe protestave masive që pasuan. Paketa legjislative parashikonte, ndër të tjera, zgjatjen e mbrojtjes nga dëbimet, rregullim më të rreptë të kontratave, ndalimin e blerjes së shtëpive private nga fondet spekulative të investimeve deri në vitin 2028, si dhe lehtësime tatimore për qiramarrësit dhe pronarët. Një dekret i dytë do të zgjaste me dy vjet kontratat e qirasë që duhej të skadonin në fund të vitit 2028.
Kërkesë e lartë, pak ndërtime
Kriza në tregun spanjoll të banesave është për shkak të shumë faktorëve. Së pari, që nga viti 2015 popullsia e vendit është rritur me tre milionë banorë, ose 7%. Në të njëjtën kohë, turizmi po shënon një rritje të fortë dhe që nga viti 2018 numri i netëve të kaluara në akomodime turistike është dyfishuar, siç vëren gazeta El País.
Në zona turistike të njohura si Ishujt Balearik, Alikante, Malaga dhe Ishujt Kanarie, shumë blerës të huaj po konkurrojnë me vendasit në tregun e banesave, duke rritur çmimet. Në të njëjtën kohë, po ndërtohen shumë më pak shtëpi të reja sesa nevojiten. Banka Qendrore e Spanjës vlerëson se, nëse asgjë nuk ndryshon, do të ketë një mungesë prej të paktën një milion shtëpish deri në vitin 2028.
"Logjika tjetër" e opozitës
Ligjvënësit e opozitës argumentojnë se masat e propozuara do ta kufizonin më tej furnizimin me banesa të reja, duke i çuar qiratë në nivele edhe më të larta. Miriam Nogueras, nga partia katalanase Junts, i bëri thirrje qeverisë të tërhiqte dekretet dhe propozoi negociata të reja për t'i ndryshuar ato. Deri në minutën e fundit, kryeministri Sanchez shpresonte që Junts të paktën do ta miratonte dekretin e parë, por kjo nuk ndodhi.
Qeveria i promovoi dy dekretet në përgjigje të pakënaqësisë në rritje të shumë spanjollëve që nuk janë në gjendje të gjejnë strehim të përballueshëm ose janë nën presion nga rritjet e vazhdueshme të qirasë, nën kërcënimin e dëbimeve. Pika e fundit ishte dëbimi i 87-vjeçares Mari Carmen Abascal, me policinë që e largoi me forcë nga shtëpia ku kishte kaluar pjesën më të madhe të jetës së saj.
Dëbimi i gruas së moshuar shkaktoi një shpërthim zemërimi. Në Madrid, si dhe në qytete të tjera në Spanjë, dhjetëra mijëra demonstrues dolën në rrugë me sloganin "Jo një Mari Carmen tjetër" ("Ni una Maricarmen más"). Në Madrid, demonstruesit kishin ngritur kampe përpara selisë së qeverisë rajonale konservatore, në sheshin qendror Puerta del Sol. Protesta të ngjashme u mbajtën edhe në Barcelonë, Sevilje dhe Malaga.
