Sulmet ruse në Ukrainë/ 8 të vrarë dhe dhjetëra të plagosur, goditet edhe Kharkivi

Të paktën tetë persona janë vrarë dhe dhjetëra të tjerë janë plagosur nga sulmet ruse në disa zona të Ukrainës, ndërsa një sulm i ri në qytetin e Kharkivit ka lënë të plagosur të paktën 22 persona, mes tyre edhe fëmijë. Kryebashkiaku i Kharkivit, Ihor Terekov, tha se një bombë ajrore e drejtuar ruse goditi një pallat banimi në orët e para të së hënës, duke shkatërruar dy kate të ndërtesës. Sipas tij, në mesin e të plagosurve janë edhe gjashtë fëmijë.

Sulmet ruse ishin raportuar në disa rajone të Ukrainës edhe gjatë së dielës. Ministri i Brendshëm ukrainas, Ivan Vihivskyi, deklaroi se tre persona, përfshirë një vajzë 16-vjeçare, u vranë nga sulmet ajrore në qytetin verior të Sumyt, ku u dëmtua edhe një qendër për fëmijë.

Në rajonin e Odesës, autoritetet raportuan një sulm masiv, ku një person humbi jetën dhe u dëmtuan ndërtesa banimi, një dyqan, një hotel, një godinë mjekësore dhe një magazinë gruri. Edhe kryeqyteti Kiev u përfshi në sulmet ruse, ku një grua dhe dy 16-vjeçarë u plagosën dhe u dërguan në spital. Administrata e qytetit tha se 16 objekte u dëmtuan, përfshirë 12 banesa, një magazinë dhe një objekt prodhimi.

Presidenti ukrainas Volodymyr Zelenskyy tha se tre persona të tjerë u vranë nga sulmet në rajonin jugor të Zaporizhias, ndërsa një sulm me dron rus në Kiev shkaktoi gjithashtu vdekjen e një personi. Sulmet vijnë në një kohë kur Rusia vijon goditjet ajrore ndaj disa qyteteve dhe rajoneve të Ukrainës.