TIRANË- Bashkëkryetari i Komisionit për Reformën Administrativo-Territoriale, Arbjan Mazniku ka nënvizuar edhe njëherë nevojën e një analize të thelluar sa i takon sfidave me të cilat janë përballur bashkitë deri tani, përmes procesit që do të udhëheq punën për rishikimin e kësaj reforme.
I ftuar në “MCN Live”, Mazniku theksoi se faza e parë do të përfshijë një valë të gjerë konsultimesh publike në të gjithë vendin, së bashku me kryetarët e bashkive, kryetarët e qarqeve, aktorë të tjerë të pushtetit vendor dhe njerëzit.
"Kemi filluar fazën e parë me ngritjen e komisionit, faza e parë e konsultimeve publike, për të krijuar një valë konsultimesh publike në të gjithë Republikën e Shqipërisë me tre nëngrupe të komisionit, një në qendër, një në jug dhe veri. Në fazën e parë do mbledhim opinionet e bashkive dhe kryetarëve, për gjërat që kanë funksionuar dhe atyre që kanë nevojë për përmirësim. Nëse bëjmë një analizë të mirë të sfidave që ka pushteti vendor, impakti që do të ketë integrimi në funksionimin e njësive vendore etj. Kemi kërkuar së pari të shkojmë në territor, të flasim me kryetarët e bashkive, kryetarët e qarqeve.
Më pas do të kemi një fazë të dytë, të konsultimeve tematike. Komisioni sërish i ndarë në grupe, do të diskutojë për çështjet sociale, urbanistike etj., me institucionet specifike, për të parë se si do zgjidhet kompentenca dhe si do të ofrohet shërbimi më i mirë.Nëse ne do të ndërtojmë këtë proces bashkarisht, i cili merret me problemet që kanë njerëzit, mënyrën sesi marrin shërbimet, nëse bëjmë një analizë të thelluar të sfidave që ka pushteti vendor, besoj se do të kemi potencialisht një produkt të mirë të dalë nga ky proces dhe nga ndjekja e të gjithë këtyre hapave", tha ai.
Për Maznikun, diskutimi nuk duhet të fokusohet mbi kufijtë apo hartën, pasi gjëja e parë që duhet analizuar janë detyrat dhe kompetencat e bashkive.
"Ky është një diskutim i parakohshëm. Diskutimi parësor lidhet me kompetencat dhe funksionet. Harta e territoriale dhe kufijtë nuk janë qëllim në vetvete. Ne na duhet që bashkitë të ofrojnë më mirë shërbime, të menaxhojë më mirë territorin e tyre, dhe ne shohim a e ofrojnë dot në mënyrën si janë organizuar sot" tha ai.
Sa i takon qëndrimit të shprehur nga ambasadori i BE-së, Gonzato Mazniku theksoi se edhe mazhoranca do që të dalë vetëm me një draft nga ky proces dhe jo me disa versione.
"Është e dëshirueshme të dalim me një zgjidhje konsesuale, pasi mazhornaca e ka treguar se drejtimi në të cilin jemi duke ecur është ai i dakordësisë, duke i dhënë parite opozitës dhe pranuam bashkëkryesimin. Përsa kohë kemi dakordësi për të punuar së bashku, padyshim shohim zgjidhje konsesuale", tha ai.
Volumi i takimeve për këtë reformë, pritet të jetë i lartë me një sërë takimesh në terren si dhe në fazën e dytë.
"Tani kemi shumë një punë të madhe përpara. Ne kemi planifikuar mbi 48 takime në territor me kryetarët e bashkive, të zgjedhurit vendor etj. Në fazën e dytë të konsultimeve tematike, janë planifikuat të jenë mbi 100 takime", tha Mazniku, i cili ndër të tjera theksoi se kjo reformë duhet bërë tani për të qenë të përgatitur për zgjedhjet e ardhshme dhe për të mos humbur nga mundësitë që do të sjellë antarësimi i Shqipërisë në BE, për të pasur bashki të afta për të përfituar dhe thithur investime.
