Misteri i Audit A6/ Dëshmia e pronarit që shiti makinën: Blerësi e mori makinën për ta provuar para noterit, në lajme pashë që u arrestua me Ergys Agasin

Zbardhen të tjera detaje nga dosja hetimore lidhur me arrestimin e ish-zyrtarit të policisë Ulian Shpataraku dhe Ergys Agasit, teksa udhëtonin me një automjet tip “Audi A6” me targa AB 323 JK.

Organet e hetimit kanë marrë dëshminë e Kadri G., tregtarit të makinave nga Shijaku, i cili figuron si pronari zyrtar i mjetit të bllokuar tashmë nga policia. Ai ka sqaruar para hetuesve se mjetin e kishte blerë në Vlorë dhe e kishte nxjerrë në shitje, duke vendosur edhe tabelën përkatëse “Shitet”.”Më datë 24.08.2026, diku nga ora 15:00, një shtetas u interesua për ta blerë automjetin.

“E njihja si fytyrë nga televizori. Ai ma kërkoi mjetin për ta provuar dhe për ta çuar në një servis që ta kontrollonte, me qëllim që më pas të bënim veprimet notariale dhe pagesën prej 15.000 eurosh,” ka dëshmuar biznesmeni nga Shijaku. “Nuk i njoh as Shpatarakun, as Agasin” Tregtari i automjeteve ka pretenduar se nuk ka pasur asnjë lidhje apo njohje të mëparshme me dy personat e arrestuar dhe se heqja e tabelës “Shitet” mund të jetë bërë nga vetë blerësi në momentin që ka marrë makinën për xhiro prove.

“Më pas pashë në lajme se ky person ishte arrestuar dhe se ndodhej pikërisht në bordin e mjetit tim Audi AB 323 JK, që tashmë është bllokuar nga policia. Unë nuk e njoh as z. Shpataraku dhe as z. Agasi,” është shprehur ai.