Pas më shumë se tre vitesh proces gjyqësor, Dhomat e Specializuara në Hagë pritet të shpallin sot, në orën 10:00, aktgjykimin ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Vendimi do të shpallet nga Trupi Gjykues II, i përbërë nga tre gjyqtarë me të drejtë vote dhe një gjyqtar rezervë. Në krye të trupit gjykues është amerikani Charles L. Smith III, ndërsa anëtarë janë gjermani Christoph Barthe dhe zvicerani Guénaël Mettraux. Në cilësinë e gjyqtarit rezervë është caktuar irlandezi Fergal Gaynor.
Charles L. Smith III – Kryesuesi i trupit gjykues
Në krye të trupit gjykues është gjyqtari amerikan Charles L. Smith III, i cili ka një karrierë të gjatë në sistemin gjyqësor të Shteteve të Bashkuara. Ai ka shërbyer për vite si gjyqtar në shtetin e Iowa-s.
Smith ka qenë gjithashtu gjyqtar i EULEX-it në Kosovë, përfshirë edhe Gjykatën Supreme të Kosovës. Në Dhomat e Specializuara të Kosovës, ai kryeson trupin gjykues që ka shqyrtuar çështjen ndaj Thaçit, Veselit, Krasniqit dhe Selimit.
Pjesë e trupit gjykues është edhe gjyqtari gjerman Christoph Barthe, i cili ka përvojë të gjatë në drejtësinë penale dhe ndërkombëtare.
Barthe ka shërbyer si prokuror publik në Gjykatën Federale të Drejtësisë në Gjermani, ku është marrë edhe me çështje që lidhen me krimet e luftës dhe gjenocidin.
Gjatë këtij procesi, ai ka qenë pjesë e trupit që ka shqyrtuar provat dhe dëshmitë ndaj katër ish-krerëve të UÇK-së.
Anëtari tjetër i trupit gjykues është gjyqtari zviceran Guénaël Mettraux, i cili ka një karrierë të lidhur me të drejtën penale ndërkombëtare.
Mettraux ka punuar në çështje që lidhen me krimet e luftës dhe ka pasur përvojë si avokat mbrojtës dhe këshilltar përpara disa gjykatave ndërkombëtare. Ai ka shërbyer gjithashtu në struktura të drejtësisë ndërkombëtare dhe është profesor i së drejtës penale ndërkombëtare.
Gjyqtari irlandez Fergal Gaynor është pjesë e trupit gjykues në cilësinë e gjyqtarit rezervë.
Gaynor ka përvojë në drejtësinë ndërkombëtare dhe ka punuar në çështje që lidhen me krimet e luftës. Ai ka shërbyer në procese pranë Tribunalit Penal Ndërkombëtar për Ruandën dhe Tribunalit Penal Ndërkombëtar për ish-Jugosllavinë.
Në procesin ndaj katër ish-krerëve të UÇK-së, Gaynor ka rolin e gjyqtarit rezervë dhe është pjesë e trupit gjykues që do të përfshihet në procedurat e shpalljes së aktgjykimit.
