TURQI- Lideri i partisë më të madhe opozitare të Turqisë ka goditur Keir Starmer duke akuzuar kryeministrin britanik se ka injoruar arrestimin e kryebashkiakut të Stambollit dhe për kthimin demokratik në Turqi. Duke folur për "The Guardian", kreu i Partisë Popullore Republikane (CHP), Ozgur Ozel, tha se ishte i zhgënjyer që Starmer nuk ka folur për sulmet ndaj një partie motër.
Duke theksuar zhgënjimet e tij me udhëheqjen laburiste dhe personalisht me Starmer që nuk ka reaguar dhe dënuar arrestimin e Imamoglut, Ozel tha se ata po bëjnë një gabim historik duke e parë këtë si një çështje të brendshme turke.
“Pasi të përfundojë kjo, ne do të kujtojmë heshtjen e miqve tanë, jo zërat e lartë dhe komentet negative të armiqve tanë," tha ai.
Imamoglu u arrestua dhe u burgos muajin e kaluar për një sërë akuzash për korrupsion, duke shkaktuar demonstratat më të mëdha antiqeveritare në Turqi në më shumë se një dekadë, ndërsa qindra mijëra dolën në rrugë.
CHP ka bërë thirrje për mitingje dy herë në javë në të gjithë Turqinë dhe një bojkot ekonomik të kompanive që ata thonë se janë pranë presidentit Recep Tayyip Erdogan, duke shpresuar të nxisë një lëvizje antiqeveritare që deri më tani ka parë pothuajse 1500 persona të arrestuar, duke përfshirë gazetarë dhe politikanë komunalë.
Ndërsa autoritetet turke këmbëngulin se akuzat kundër kryebashkiakut të Stambollit nuk janë të politizuara, Ozel e cilësoi atë një gjyq politik, duke shtuar se Erdogan i burgos avokatët e tij, ata që e shqetësojnë atë dhe ekipin e tij politikisht.
Pavarësisht ndalimit të papritur të kryebashkiakut, kreu i CHP tha se partia tashmë ka hartuar planet se si Imamoglu mund të bëjë fushatë për presidencën edhe nëse ai mbetet pas hekurave. Ozel i etiketoi zgjedhjet e ardhshme një referendum nëse do të ketë autokraci apo demokraci në Turqi.
"Nuk është e drejtë të bësh negociata joparimore me Erdoganin për shkak të shqetësimeve të sigurisë. Të kesh ushtrinë e parë më të madhe të NATO-s në duart e Trump dhe ushtrinë e dytë më të madhe të NATO-s në duart e një autokrati nuk i ndihmon askujt," tha ozel.
Ai akuzoi Starmerin se i jepte prioritet çështjeve të sigurisë rajonale si ngjarjet në Siri mbi heqjen e të drejtave demokratike dhe "padrejtësitë e mëdha" që po ndodhin në Turqi.
“Humbësi i këtij procesi, jo vetëm në sytë e mi, por në sytë e forcave demokratike në mbarë botën, është Erdogan në Turqi dhe Starmer në nivel ndërkombëtar”, tha ai.
