Gjykata e Lartë në SHBA "ngrin" përkohësisht dëbimet e venezuelianëve të arrestuar

 

SHBA- “Ngrirja” e përkohshme e dëbimeve të burrave venezuelanë në paraburgimin e emigracionit u urdhërua nga Gjykata e Lartë e SHBA-së, pas një apeli të avokatëve të tyre, të cilët u ankuan se largimi i tyre ishte i pashmangshëm pa iu dhënë mundësia e kërkuar për rekurs ligjor.

"Qeveria urdhërohet të mos deportojë asnjë anëtar të grupit të dyshuar të të arrestuarve deri në urdhra të mëtejshëm nga Gjykata," thuhej në vendimin e Gjykatës, botuar herët të shtunën.

Gjykatësi konservator Clarence Thomas nuk u pajtua publikisht me vendimin. Vendimi i gjykatës amerikane vjen krahas rasteve kur drejtësia vë në pikëpyetje praktikat e administratës së Donald Trump për emigracionin. Qarqet juridike po kritikojnë gjithashtu qeverinë amerikane për anashkalimin sistematik të garancive të procesit të rregullt ligjor.

Padia u ngrit të premten nga Unioni Amerikan i Lirive Civile (ACLU), duke përmendur transferimin masiv të dhjetëra venezuelianëve nga një qendër paraburgimi në Teksas. Emigrantët dyshohet se morën dokumente që i akuzonin si anëtarë të organizatës kriminale Tren de Aragua. Sipas ligjit të "të huajve të armikut", akuza çon në dëbim.

Sipas ACLU, në disa raste të arrestuarit u informuan se dëbimi i tyre ishte i pashmangshëm madje edhe “në mes të natës”. Një avokate u ankua se klienti i saj, i cili flet vetëm spanjisht, u detyrua të firmoste dokumentet në anglisht, ndërsa iu tha: "Këto letra vijnë nga presidenti. "Do të deportoheni, nëse i nënshkruani apo jo".

Edhe pse gjykatësi i qarkut të Teksasit, James Hendrix, kishte mohuar përkohësisht ndalimin e deportimit për dy burra, duke përmendur deklaratat e autoriteteve se ata nuk do të hiqeshin menjëherë, ACLU dorëzoi deklarata të reja që dokumentonin të burgosurit që futeshin në autobusë për dëbim. Gjykatësi nuk u përgjigj, kështu që ACLU iu drejtua një gjyqtari federal në Uashington, duke kërkuar urgjentisht ndalimin e dëbimeve.

Dokumentet e dorëzuara për të arrestuarit përfshinin deklaratat e mëposhtme: "Ju jeni caktuar si i huaj armik dhe jeni subjekt i arrestimit, mbylljes dhe largimit nga Shtetet e Bashkuara. Kjo procedurë nuk bie nën Ligjin e Emigracionit dhe Shtetësisë."